LAOAG CITY – Naiget a naglikudan ni Senate Minority Leader Alan Peter Cayetano ti alegasyon ni Senador Panfilo “Ping” Lacson nga adda dagiti “ghost projects”iti Taguig ken kinarit na a mangiparuk-at ti ebidensya tapno paneknekan ti akusasyon.
Iti maysa nga statement, inbatad ni Cayetano a sumagmamano a darasen a tiningiting ti nagduduma nga ahensya ti gobyerno dagiti proyekto iti Taguig ngem awan ti naestablisar a ghost projects.
Segun iti senador, uray ti opisina na ket nangiyuswat met ti bukod a beripikasyon idi rimuar dagiti alegasyon ti korapsyon kadagiti proyekto ti gobierno.
Kuna na a regular a matingtingiting ti estado dagiti proyekto tapno masigurado a malpas dagitoy ken mapondoan dagiti saan pay a kompleto.
Inlawlawag pay ni Cayetano a ti maysa a“ghost project” ken mangdeterminar iti proyekto a nabayadan ti gobierno ngem awan ti aktuwal a naipatakder wenno naipatungpal.
Kagiddan iti daytoy, ginutigot ni Cayetano ti Department of Public Works and Highways (DPWH), iti panangidaulo ni Secretary Vince Dizon, a bilinen ti amin a district engineers ken no mabalin ket uray dagiti local government units (LGUs), nga alaan ti ladawan ken idokumento ti amin a flood control projects tapno alisto a maestablisar no adda dagiti proyekto a saan a naipatungpal.
Inpetteng na a no adda ti mapaneknekan a ghost projects, masapol nga agsungbat dagiti responsable aniaman ti posisyon da iti gobierno.
