LAOAG CITY – Saan a naglikudan ti kampo ni Senador Loren Legarda ti posibilidad nga agsubli daytoy manen iti pagilian ken agsubli iti majority bloc ti Senado.
Segun iti spokesperson ni Legarda a ni Tony la Viña, a maipagarup a normal iti senado ti panagbaliw dagiti kaalyado, aglallalo ta uppat nga senate president ti nasukatan iti naglabas nga uppat a tawen.
Kuna pay ni la Viña, saanen a nakaskasdaaw no nakikoordinar ni Legarda iti dadduma pay nga senador gapu ta naurnos ti relasionna kadagiti kakaduana iti Senado.
Nupay kasta, kuna ti spokesperson a saanna makita ti direkta nga adda pakainaiganna ti impeachment proceedings ti panagikkat ni Legatda iti senado.
Imbes, intudona ti political fallout manipud kadagiti alegasion ti korapsion nga inbato ti anak ni Legarda a ni Batangas Representative Leandro Leviste.
Maipalagip a naka-medical leave ni Legarda manipud idi Agosto 3 ken ti kaudian nga extension ti leave-na ket agpaot agingga Oktubre 9.
Kabayatanna, kagiddan ti nabayag a pannakaawanna ket ti imbestigasion ti ombudsman iti maipagarup a multibillion-peso solar energy anomaly a nakairamanan ti Senador ken ti anakna.
