LAOAG CITY – Saan a pirmaan ni Senador Panfilo “Ping” Lacson iti ratipikasyon ti 2026 budget bill no ilungalong ti bicameral conference committee ti panangpondo kadagiti kontrobersiyal nga aid programs a dinillaw na kas baro a rupa ti “pork barrel.”
Karaman kadagiti dinillaw ti Senador ti kontrobersiyal a P51 billion a pondo para iti Medical Assistance to Indigent and Financially Incapacitated Patients (MAIFIP) ti Department of Health (DOH).
Inpetteng ti Senador a masapol nga i-realign ti nasao a pondo iti Universal Health Care programs kas ti panangsakop iti amin a barangay ken masigurado ti zero billing.
Inkalintegan ni Sen. Lacson a ti guarantee letters manipod kadagiti pulitiko ket mangipaay laeng ti gundaway iti patronage politics ken saan a ti kasapulan a panangsalwad iti salun-at dagiti Pilipino kangrunaan na dagiti marigrigat.
Inrekomendar met ti Senador a mabalin a maaddaan paylaeng ti safeguards iti babaen ti special provisions kabayatan nga agtultuloy ti bicam deliberations tapno malapdan a makontrol dagiti kastoy a tulong pinansiyal nga awan ti naan-anay nga assessment.
Maysa pay nga item a dinakamat ti senador a nangkumbinsir kenkuanaa saan nga agpirma iti ratipikasyon ti budget ti farm-to-market roads project ti Department of Agriculture, no sadinno a nagdoble manipod iti kidkiddawen ti presidente nga alokasyon ti bicam nga adda iti P33 billion.
Iti agdama, agtultuloy ti panag-reconcile ti bicam iti pinal dagiti probisyon ti 2026 budget bill.
Apaman a maipinal ti budget ket maisubli iti kababaan ken kangatoan a pagpandayan linteg iti kongreso para iti ratipikasyon.
