LAOAG CITY – Inadmitir ni Sen. Raffy Tulfo a ti behikulo a nagluganan ti anak na a ni Quezon City Second District Rep. Ralph Wendel Tulfo ti naduktalan a nagna iti EDSA Busway.
Nupay kasta, kuna ni Senador Tulfo nga awan ti makita na a problema iti insidente gapu ta saan a nangabuso, saan a nagsasao ti dakes, saan a nagusar ti plaka nga otso a karbengan na koma met nga usaren ngem saanna nga inaramid, pammaneknek daytoy a saan nga abusado ti kongresista.
Kuna pay ni Senador Tulfo nga inadmitir a dagus daytoy ti anak na ngem sinermonan na latta daytoy ken inbilin na a nga agpadespensar iti publiko.
Immunan nga inpetteng ti Metro Manila Development Authority (MMDA) a dagiti laeng mabalin a magna iti Busway ket dagiti authorized buses, emergency vehicles, behikulo ti President, Vice President, Senate President, Speaker of the House of Representatives, ken Supreme Court Chief Justice.
Maipalagip nga inrakurak ti Special Action and Intelligence Committee for Transportation (SAICT) nga adda ti tiniliw da a driver ti saanen a nainaganan nga agpanpanday linteg gapu iti panangusar na ti EDSA Carousel idi Enero 23, 2025, ken natiliw pay daytoyen idi Setyembre 26, 2024 gapu iti panagusar na metlaeng iti busway.
