LAOAG CITY – Kinumpirmaran ti National Bureau of Investigation (NBI) nga ibilangda a “person of interest” ni Senador Robin Padilla mainaig iti panagpukaw ni Senador Ronald “Bato” dela Rosa kalpasan a timmalaw daytoy iti Senado iti parbangon ti Huebes.
Inbatad ni National Bureau of Investigation Director Melvin Matibag a maipagarup a ni Padilla ti naudi a nakita a kadua ni Dela Rosa sakbay a naan-anay daytoy a nagpukaw iti uneg ti Senate premises.
Inlawlawagna nga otomatiko a karaman ni Padilla kadagiti nasken a pagsaludsudan tapno maammoan ti lokasion ti senador.
Timmalaw ni Dela Rosa iti Senado sumagmamano nga oras kalpasan ti tension ti panagpinnutok ti paltog iti uneg ti pasdek idi Mierkoles ti rabii kabayatan nga isuna ket adda iti babaen ti “protective custody” ti Senado mainaig iti warrant manipud iti International Criminal Court gapu iti kaso a crimes against humanity nga adda ti pakainaiganna iti war on drugs ti napalabas nga administrasion.
Kuna ni Matibag nga adda ti atap ti sumagmamano nga ahente ti National Bureau of Investigation a posible nga inaramid a “diversion” ti napasamak a panagpinnutok ti paltog tapno makalibas ni Dela Rosa.
Segun pay iti opisial, inpetteng ti asawa mismo ti senador a ginundawayanna ti riribok tapno makatalaw iti Senado.
Agtultuloy ti pannakikoordinar ti National Bureau of Investigation iti Department of Justice kabayatan nga agtultuloy ti imbestigasion iti insidente ken iti posible nga ayan ni Dela Rosa.
