LAOAG CITY – Inrakurak ni Sen. Sherwin Gatchalian ti suportana iti gakat a maadal manen ti oil deregulation law tapno maipaayan ti nabilbileg ti gobierno iti panag-regulate ti presio ti langis.
Segun iti Senador, nangipasa isuna ti gakat nga amendaran ti agdama a pagannurotan a manglimitar iti pannakibiang ti gobierno iti fuel pricing.
Inbatadna a ti karaman kadagiti ad-adda nga apektado iti panagngato ti presio ti langis ti sektor ti transportasion isut gapuna a maawatanna dagiti arungaing dagiti driver ken operator.
Nupay kasta, inlawlawag ni Gatchalian a naannad ti gobierno iti panangbalanse kadagiti addang tapno matulungan ti publiko kabayatan a pagtaltalinaeden ti umanay a biruk ti gobierno.
Kunana a nupay mabalin daytoy a makatulong ti panangikkat ti excise tax wenno value-added tax (VAT) kadagiti produkto a petrolyo, posible met daytoy a makaapektar iti pundo para kadagiti subsidy ken napapateg a serbisio ti gobierno.
Maipalagip nga inaprobaran ti Senado ken Kamara de Representantes ti gakat a mangipaay ti bileg ken ni Presidente Ferdinand Marcos Jr. a temporario nga isuspenso ti excise tax iti petroleum products no kasapulan.
