LAOAG CITY – Inbatad ni Senador Sherwin Gatchalian nga irekomendar na iti Senate blue ribbon committee ken iti Independent Commission for Infrastructure (ICI) nga imbestigaren da ti maipagarop nga overpriced farm-to-market road (FMR) projects ditoy pagilian.
Inaramid daytoy ni Gatchalian, chairman ti Senate finance committee, kalpasan nga inbutaktak na nga adda ti maipagarop nga overpriced farm-to-market road projects idi 2023 ken 2024, nga agbalor ti P10.3 billion.
Kuna na a manipod iti P15,000 per meter, ket nagbalin a P300,000 per meter.
Segun ken ni Gatchalian, ti manarimaan a proyekto iti Barangay San Roque iti Tacloban City, Leyte ket maikonsiderar kas overpriced project, nga agbalor ti P348,432 per meter.
Inpetteng na a ti standard cost para kadagiti farm-to-market road projects nga inkeddeng ti Department of Public Works and Highways (DPWH), ket P15,000 per meter, ken mabalin pay a bumaba iti P10,000 per meter.
Innayon ti sendor a dagiti tallo a contractors iti Top 10 list ti “extremely overpriced” farm-to-market road projects projects, ket karaman kadagiti contractors a nangibulsa ti 20% ti pakabuklan a P545 billion budget ti flood control projects, nga inbulgar ni President Ferdinand “Bongbong” Marcos Jr. idi Agosto ita a tawen.
Inpakaammo ni Gatchalian a maysa kadagiti tallo a contractors, ket ti Hi-Tone Construction & Development Corp., a maipagarop nga adda ti koneksyon na ken ni Ako Bicol Party-list Representative ken House appropriations committee chairperson Zaldy Co.
