LAOAG CITY – Ad-adalen ti Senate Committee on Finance a kissayan laeng ti 15 agingga iti 20 a porsiento ti budget para kadagiti road projects nga imbes a naan-anay a kissayan dagiti amin a proyekto nga ipatpatungpal ti Department of Public Works and Highways (DPWH).
Daytoy ket kalpasan a nakita ti komite manipud iti panangtingitingda nga adda dagiti sumagmamano a proyekto a nainkalintegan ti presyo dagiti materyales ken nasken a saan a mairaman.
Inbatad ni Senate Committee on Finance Chairman Sherwin Gatchalian, no aramidenda nga “across the board” ti panagkissay kadagiti infrastructure projects, mairaman met dagiti proyekto nga adda ti natibker a pangibasaran ken justified ti balorna.
Maysa nga opsyon a makitkita ti senador ket kissayan dagiti road projects laeng gapu ta dagitoy dagiti proyekto a nakitaan ti adu nga overcosting.
Kabayatanna, inlawlawag ni Gatchalian a ti posible a ₱348 bilyon a panagkissay iti budget ti Department of Public Works and Highways ket nakadepende pay iti isubmitir a dokumento ken iti agbalin a palawag ti ahensia inton Lunes.
