LAOAG CITY – Nangiparuk-aten ti arrest order ti Senado kontra ken ni suspended Bamban, Tarlac Mayor Alice Guo.
Daytoy ket kalpasan a saan a nagatendar iti maiwaywayat a panagdengngeg iti nangato a pagpandayan linteg iti kongreso maipapan iti iligal nga operasion ti Philippine Offshore Gaming Operators iti pagilian.
Inbilin ti Office of the Senate Sergeant-At-Arms ti panagiyisyu ti nasao a pammilin iti uneg ti 24 nga oras.
Basar iti Senado, ti saan a panagatendar ni Guo iti panagdengngeg idi Hunio 26 ken Hulio 10 ket nalawag nga istratehia tapno maitantan ti panagdengngeg.
Naammoan a karaman kadagiti ipaarestar ti Senado ket ti ama ni Guo a ni Jian Zhong Guo, dagiti kabsatna nga isuda Sheila, Wesley ken Seimen Guo, maipagarup nga ina ni Guo a ni Wen Yi Lin ken da Nancy Gamo ken Dennis Cunanan a dati nga Accountant a rumrummuar a mangiripripresentar ti Philippine Offshore Gaming Operators iti Bamban.
Kabayatanna, iti agdama ket awan pay ti sungbat ti kampo ni Guo maipanggep iti nasao a pammilin.
