LAOAG CITY – Nakasagana ti Senate Committee on Women, Children, Family Relations and Gender Equality a makitinnulong iti agtultuloy nga imbestigasyon ti Bureau of Internal Revenue (BIR) seknan iti posible a tax evasion ti suspended Bamban, Tarlac Mayor Alice Guo.
Segun kenni Committee Chairperson Risa Hontiveros, saan a masdaaw isuna iti sangsangwen ni Mayor Guo, gapu ta dandani amin a dokumento nga addaan iti nagan ni Guo ket mapagduaduaan.
Inbatad na a manipud iti birth certificate agingga iti SALN na ket awan ti umno nga explanation ni Guo isut gapuna a binalakadan ni Hontiveros ti Mayor nga ibagana ti pudno sakbay pay nga isuda a mismo ti makaduktal.
Kagiddan daytoy ti panangsigurado ti kooperasion ti komite na iti Bureau of Internal Revenue, no sadinnp a nagyaman pay ti senador kadagiti ahensia ti gobierno iti gannuat a mangsungbat kadagiti addaan ti basol.
Kabayatanna, inbatad met ni Senate Committee on Ways and Means Chairman Sherwin Gatchalian a dinakamat da pay iti hearing a ti naideklara a kita ti kompania ti pamilia Guo ket saan a maitunos iti assets ken investments ni Mayor Guo, no sadinno a daytoy ti pakakitaan nga adda dagiti sabali pay a sources ti Mayor manipud iti ruar a saan a naideklara kadagiti tax returns-na.
