LAOAG CITY – Adu pay ti nasken a pagsasaritaan dagiti Senador mainaig iti maisayangkat nga impeachment trial kontra ken ni Vice President Sara Duterte apaman nga agsubli ti sesyon.
Ita a nalpasen ti eleksion, sumaruno nga agbalin a makumikom dagiti Senador para iti impeachment process a marugian iti panagsubli ti sesyon inton bulan ti Hunio.
Inbatad ni Senador Joel Villanueva, naikeddeng a mangrugi ti proseso iti panaglukat ti sesyon ngem daytoy ket rugianan pay laeng iti pannakaidatag ti “rules of impeachment.”
Nupay kasta, saanen nga agbalin a paset iti panangtingiting dagiti graduating a Senador idinto a sumrek dagiti baro a Senador nga isuda ti marukudan kadagiti robes gapu ta dagiti nangabak ita nga eleksion ket dagitoy ti agtugaw kas senator judge ti impeachment court.
Kabayatanna, napateg kadagiti Senador nga umannugotda a rugian ti trial no nakumpleton dagiti mangbukel iti impeachment court ken no nalpasdan ti rules para iti impeachment.
