LAOAG CITY – Ilunglungalong iti Senado ti gakat a gagem na a pagbalinen a kangrunaan nga opsyon ti digital payment kadagiti transaksyon iti gobyerno tapno mapaalisto ti panagbayad kadagiti mabayadan ken panagibunong ti pondo iti publiko.
Iti babaen ti Senate Bill No. 2330 wenno eBayad Act, nga inpila ni Senador Christopher “Bong” Go, obligareb dagiti ahensya ti gobierno, government-owned and controlled corporations, local government units, state universities and colleges, ken dadduma pay a sakupen ti linteg nga agawat ken agusar ti interoperable digital payment systems iti koleksiyon ken panangiparuk-at ti pondo.
Sakupen ti digital disbursement ti panagbayad ti allowance, honoraria, cash assistance ken dadduma pay a paggastusan ti gobierno, idinto nga obligaren met a mangipaay ti digital payment options iti panagbayad ti buwis, permit, fees, tolls ken dadduma pay a koleksyon ti gobyerno.
Nailanad pay iti gakat ti panangiparuk-at ti electronic official receipts wenno digital proof of payment tapno mapapigsa ti transparency ken al-alisto a ma-audit ti panagusar ti pampubliko a pondo.
Karaman pay iti gakat ti panangipaay ti insentibo kadagiti lokal a gobierno tapno gutiguten ti babassit a negosyo kas dagiti sari-sari store, market vendors, food stall owners ken tricycle drivers, nga agusar ti digital payment systems kadagiti transaksyon da.
Tapno masigurado ti seguridad ti sistema, maibilbilin met kadagiti payment service provider a sumurot kadagiti maipatpatungpal a linteg iti data privacy ken cybersecurity, idinto nga agtalinaed ti bileg ti Commission on Audit a mangisayangkat ti post-audit iti amin a digital transactions nga adda ti pakainaigan ti pondo ti gobierno.
Iti babaen ti gakat, maipaayan dagiti ahensya ti gobierno ti agingga iti tallo a tawen tapno naan-anay a maipatungpal ti digital payment system basar iti kinasagana da.
Mapatawan met ti multa a P200,000 agingga iti P2 milyon, pannakabalud ti dua agingga iti 10 a tawen, wenno agpada kadagiti aglabsing kadagiti probisyon ti nailungalong a gakat ken dagiti regulasyon nga ipatpatungpal ti Bangko Sentral ng Pilipinas.
