LAOAG CITY – Dinillaw ni Senator Imee Marcos ti agtultuloy a panagusar ti imported a bagas iti programa a “benteng bigas” ti gobierno iti baet ti agdama a panagapit ken maipagarop a kaawan ti deklarasyon a panagkurkurang ti suplay.
Segun ken ni Marcos, awan ti maipagarop a pannakaideklarar ti shortage ti Department of Agriculture (DA) ngem agtultuloy latta ti panagangkat ti gobyerno,no sadinno a para kenkuana ket maysa a nalawag a pananggundaway ti sumagmamano nga opisyal nga ad-adda a pilyen da ti makapastrek imbes a maprotehiran ti pagsayaatan dagiti lokal a mannalon.
Binabalaw pay ti senador ti arigna maipagarop a panangipalubos ti sumagmamano nga opisyal ti Food Terminal Incorporated (FTI) iti importasyon tapno mapagtalinaed dagiti posisyon da, imbes nga iwanwan ti mandato ti ahensya a masapol ket direkta nga aggatang kadagiti apit dagiti lokal a mannalon.
Dinakamat pay ti senador ti maipagarop a saan a panangipatungpal ti contract growing arrangements a mabalin a makatulong kadagiti mannalon imbes nga usaren kas rason tapno itultuloy ti importasyon.
Kabayatanna, nagpanawagan ni Marcos iti gobierno nga itutuk ti suporta iti lokal a sektor ti agrikultura ken saan a protehiran dagiti mairanranud iti importasyon ti bagas.
