LAOAG CITY – Naiget a kwinestyunaran ni Senator Imee Marcos ti Executive Order No. 116 a nangpalawa ti importasyon ti karne ti baboy iti paglian iti babaen ti panangipangato ti Minimum Access Volume (MAV) manipud 54,210 metric tons napagbalin a 204,210 metric tons, wenno agarop mamin-uppat a daras a nangatngato.
Immunan nga inlawlawag ti gobierno a gagem ti addang a maipagarop a mapunwan ti suplay ti baboy ken maipababa ti presyo na iti merkado iti baet ti inflation.
Nupay kasta, inpetteng ti senadora a saan nga umdas a pagibasaran ti nasao a pagannurutan.
Inpalgak ni Senadora Marcos a kalokoan ti nagibasaran ti Executive Order 116 gapu ta mismo a ti Philippine Statistics Authority ti nangibaga a bagas, mais, ikan ken nateng ti kangrunaan a makaigapu iti inflation, saan ketdi a baboy.
Inkalintegan na a maipagarop a saan a ti kinakurang iti suplay ti problema iti lokal nga industriya ti baboy, no di ket epekto ti nalawa nga importasyon.
Segun ken ni Marcos, umabot iti 891 milyon a kilo ti imported pork ti simrek iti pagilian idi 2025, idinto nga agarop 300 milyon a kilo ti naangkat iti umuna a bolan ti 2026.
Innayon na a bimmaba met ti farmgate price ti lokal a baboy manipod iti ₱170 ti kada kilo iti napalabas a tawen napagbalin a ₱165 kada kilo ita a tawen, nga ibilang ti senadora nga epekto ti panagado ti imported a produkto iti merkado.
