LAOAG CITY – Nagballaag ni Senador Win Gatchalian a mabalin nga umado ti bilang dagiti college dropout gapu iti panagbaba ti maipapaay a tulong pinansyal kadagiti benepisyaryo ti Tertiary Education Subsidy (TES).
Nupay 79.2% kadagiti Tertiary Education Subsidy grantees ti agturturpos, agamak ni Gatchalian a mabalin a bumaba daytoy a bilang gapu iti panagbaba ti tulong pinansyal para kadagiti maseknan.
Iti napalabas a deliberasyon iti nailungalong a pondo ti Commission on Higher Education (CHED), ginutigot ni Gatchalian ti Komisyon nga adalen manen ti kantidad a maipapaay para kadagiti benepisyaryo ti Tertiary Education Subsidy tapno masigurado a makaturpos dagitoy iti panagadal.
Inpetteng ni Gatchalian nga us-usaren dagiti benepisyaryo ti Tertiary Education Subsidy ti maaw-awat da a paggatang kadagiti banag a kasapulan da iti panageskwela da.
Maipalagip a sigud a makaaw-awat ti P60,000 dagiti Tertiary Education Subsidy grantees manipod kadagiti pribado nga higher education institutions (HEIs) ken P20,000 iti nasao a pondo ket para iti matrikula idinto a ti nabati a 40 a ribo a pisos ket para iti transportasyon, taraon, pagnaedan, gamit iti panagadal ken dadduma pay.
Nupay kasta, nagdesisyon ti Unified Student Financial Assistance System for Tertiary Education Board nga ipababa ti tulong pinansyal a maipaay kadagiti maseknan tapno umado met dagiti benepisyaryo.
