LAOAG CITY – Ad-adalenen ni Senador Win Gatchalian ti panangipila ti gakat a mangipawil ti panagusar ti selpon ken dadduma pay a gadgets iti uneg ti klasrum.
Segun ken ni Gatchalian, ti Chairman ti Senate committee on Basic Education, basar kadagiti obserbasion, adu kadagiti ubbing ti naadik iti panagusar ti selpon uray iti uneg ti klasrum.
Gapu iti daytoy, imbes nga agbasbasa dagiti ubbing ket mas pilienda ti agusar ti selpon iti panagbuya ti YouTube ken TikTok videos kabayatan nga adda iti klase.
Kunana a palubusan laeng nga agusar ti selpon kalpasan ti klase wenno school hours wenno iruar laeng no agawiden dagiti estudiante ngem no adda dagitoy iti uneg ti klasrum ket maipawil daytoy nga usaren.
Mamati ni Gatchalian a ti mobile phones ken dadduma pay a gadgets ket mangkissay kadagiti estudyante ken agtutubo nga agbasa, agadal ken makipinnulapol kadagiti tattao.
Inpaganetgetna nga iti addangna ket tapno maallukoy dagiti Pilipino nga agbasa ken gumatang kadagiti libro.
Innayonna a mangilungalong pay isuna iti panangideklara iti bulan ti Nobiembre kas National Reading Month.
