LAOAG CITY – Ginutigot manen ni Senador Win Gatchalian ni Department of Education (DepEd) Secretary Juan Edgardo “Sonny” Angara a solbaren dagiti problema iti senior high school voucher program (SHS-VP).
Inbatad ni Gatchalian a karaman kadagiti rumbeng nga urnusen ni Angara ket dagiti “ghost” student beneficiary ken pannakapaay nga iprayoridad ti panagadal dagiti agad-adal a kangrunaan nga agkasapulan.
Ti panawagan ni Gatchalian ket kalpasan ti panangipruk-at ti 2026 annual audit report ti Commission on Audit (COA) iti Department of Education.
Kinondenar na ti report mainaig iti kinakurang ti nalawag ken “standardized parameters” iti panag-assess iti kabaelan ti pinansyal dagiti agad-adal.
Dinakamat pay ti Commission on Audit nga adda dagiti kaso a saan a mailawlawg ti panagbalin nga absent dagiti maibagbaga a benepisyaryo no adda ti monitoring visit, pannakailista ti nagan dagiti estudyante a nasursurok ngem maysa iti maysa a pagadalan wenno iti dadduma a pageskwelaan ken ti kaaddan ti status nga “enrolled” uray saan a sumsumrek iti klase.
Maipalagip nga idi 2024, indaulwan ni Gatchalian ti maysa nga imbestigasyon iti Senado a nangibutaktak a P7.21 bilyon ti nagastos para kadagiti saan a marigrigat a benepisyaryo ti senior high school voucher program para iti School Year 2020–2021.
Gapu iti daytoy, ginutigot na ti DepEd nga ipangpangruna dagiti marigrigat nga agad-adal a benepisyaryo ti senior high school voucher program.
