LAOAG CITY – Kinumpirmaran ni Senate Ad Hoc Committee chairperson Sherwin Gatchalian a mangisayangkat ti umuna a panagdengngeg ti idaulwan na a komite intono Martes, Marso 24 mainaig iti epekto ti krisis ti kumarkaro a tensyon iti Middle East iti pagilian.
Iti maysa nga interview, inbatad ni Gatchalian a tingitingen ti komite no umdas ti pondo iti General Appropriations Act 2026 tapno solusyunan ti epekto ti krisis gapu iti tensyon iti nagbaetan ti Estados Unidos, Israel ken Iran.
Kuna na nga iti maika-22 nga aldaw ti gubat, masapol nga adda dagiti nakasagana nga addang ti gobierno tapno matulungan dagiti direkta nga apektado kas kadagiti driver ken motorista a matamtamaan ti nangato a presyo ti langis.
Innayon ti senador a mabalin a maapektaran ti food security gapu iti panagserra ti Strait Hormuz a napateg a ruta ti sangalubungan a trade ti langis, natural gas ken uray ti abono.
Gapu iti kumarkaro a sitwasyon, inkeddeng ni Gatchalian ti panagdengngeg uray naka-break ti Kongreso iti panawen ti Holy Week.
Inrakurak na a kasapulan a mangisumitir dagiti ahensya ti gobyerno ti contingency plans da a mabalin a pagmaymaysaen karaman ti panagsagsagana iti worst-case scenarios.
Mainaig iti daytoy, inlungalong ti senador ti panaginot ti gobierno, karaman ti panagkissay ti work travel, iyaakar iti online training ken limitasyon iti representation expenses a mabalin nga umabot iti P90 bilyon ti mainot ti gobyerno iti kastoy nga addang.
