LAOAG CITY – Nagdesisyon dagiti senator-judges nga i-remand wenno isubli iti kamara de representantes ti impeachment complaint kontra ken ni Vice President Sara Duterte.
Daytoy ket kalpasan ti naunday a deliberasyon iti impeachment court.
Ni Senador Alan Peter Cayetano ti nagmosyon iti impeachment court idinto a 18 ti pimmabor, 5 ti nangkontra ken awan ti nag-abstain tapno maisubli ti impeachment case kontra iti bise presidente.
Dagiti met senator-judges a nangkontra ket isuda Senate Minority Leader Koko Pimentel; Senadora Risa Hontiveros; Senadora Nancy Binay; Senadora Grace Poe
ken Senador Sherwin Gatchalian.
Immuna iti daytoy, nag-mosyon ni Senador Ronald “Bato” dela Rosa nga ibasura ti impeachment complaint kontra iti bise presidente, no sadinno a pinaboran met daytoy ni Senador Bong Go.
Nupay kasta, inpetteng ni Senador Cayetano a saanna a paboran ti kayat ti kalikagom da dela Rosa ken Go a mabasura ti impeachment case kontra ken ni Vice President Duterte.
Inpaganetget na a nasaysayaat laengen no isubli ti kaso iti kamara de representantes a pinaboran ti kaadoan a kameng ti senado.
