LAOAG CITY – Inpalagip ni Senate Impeachment Court Spokesperson Atty. Reginald Tongol nga ad-adda a sakup ti subjudice rule dagiti senator-judges.
Daytoy ket mainaig iti post ni Senator-judge Robin Padilla iti social media account-na no sadinno nga inbatadna a duplicate ken saan a maibilang nga orihinal ti kopya ti video nga inparuk-at ti impeachment trial a napasamak ti maipagarup a panagpangta ni Vice President Sara Duterte iti biag ni Presidente Ferdinand Marcos Jr.
Inbatad ni Tongol nga ad-adda a sakup ti subjudice rule dagiti senator-judges gapu ta kas political process ti impeachment trial, aniaman nga opinyon mainaig iti merito ti kaso ket mabalin a maaddaan ti impresyon a saan a patas iti panangusig.
Inlawlawagna a posible nga agtungpal nga awan ti pakaibanaganna ti iwaywaywat a trial no makita kadagiti senator-judges ti impropriety wenno panagbalin a bias wenno prejudice.
Innayonna a pagan-annaden dagiti senator-judges iti babaen ti impeachment rules tapno saan a mapukaw ti respeto ken ti kumpiansa ti publiko iti agbalin a desision ti impeachment court.
