LAOAG CITY – Tiningiting dagiti Senator-judges ti nagsasaruno a transaksiyon no sadinno nasurok a P96 milyon manipod iti joint account da dati a Presdente Rodrigo Duterte ken Vice President Sara Duterte ti paulit-ulit nga inaramid manager’s checks.
Segun ken ni Witness Marwin Galvez, division head ti maysa a bangko, no inusar ti pondo tapno gumatang ti manager’s check, saanen a karaman daytoy iti balance ti nangalaan ti account bayat a nagtalinaed ti outstanding ti tseke.
Nupay kasta, nagtalinaed ti kwarta iti settlement account ti bangko para iti manager’s checks.
Inpakita ti prosecution ti records ti dua a time deposit nga agbalor ti sumuruk-kumurang a P41 milyon ken P55 milyon.
Segun ken ni Prosecutor Atty. James Bryan Ibrahim Alih, nausar dagitoy tapno mangala ti manager’s checks a saan a dagus a na-encash, nga iti saan a nagbayag ket naisubli ken nasukatan ti baro a checks.
Umabot iti innem a nagsasaruno a cycle ti nasao a transaksiyon manipod iti 2011 agingga iti 2013.
Inawagan daytoy a “tinikling” ni Senator-judge Vicente Sotto III, basar iti maipagarop a panangiladawan ti maysa a banker iti naulit-ulit a panagisyu, saan a panangusar ken panangisubli ti manager’s checks.
