LAOAG CITY – Natay ti maysa a senior citizen nga ambulant vendor a nagpositibo ti covid-19 kabayatan a maag-agasan iti Mariano Marcos Memorial Hospital and Medical Center iti ciudad ti Batac.
Daytoy ti kinumpirmaran ni Barangay Chairman Lauro dela Cruz iti Barangay 12 ditoy ciudad ti Laoag.
Inbaga ti kapitan a makalawas a naka-confine ti nasao a pasyente iti ospital ken idi laeng kalman ket pimmusayen daytoy.
Kuna ni dela Cruz nga idi naamoan da a pimmusayen ti nasao a pasyente ket naalarma da ket mabuteng payen dagiti Barangay Health Workers (BHW), ngem inbaga na nga annungen da latta ti trabaho da gapu ta isuda ti agserserbi iti barangay da.
Innayon na a maikabil iti ciudad ti Vigan ti bangkay ti pimmusay a pasyente para iti pannakai-cremate na.
Iti agdama, kuna ni dela Cruz nga adda ti 13 a nagpositibo ti covid-19 iti barangay da a dagitoy naggapo laeng iti dua a pamilya ken ti kaubingan ket agtawen laeng ti walo.
Inpakaammo ti nasao a kapitan nga ada pay ti 10 a kabarangayan da a naswab test ken iyur-uray da ti resulta na.
