LAOAG CITY – Kinumpirmaran ni Brgy. Kagawad Zenaida Balbag ti Chairman ti Committee on Health ti Brgy. Malasin iti ili Bangui a pimmusay ti maysa kadagiti kabarangayanda kabayatan nga adda pay laeng daytoy iti Quarantine Facility.
Segun kenkuana, ti maseknan ket maysa a Senior Citizen nga agtawen ti 70 a lalaki ken residente iti nasao a Barangay.
Inlawlawagna a naammoanna daytoy a banag kalpasan nga adda ti timmawag kenkuana a Barangay Health Emergency Response Team wenno BHERTs nga agbanbantay iti Quarantine Facility iti Nagbalagan Elementary School nga adda ti indibidual a kasapulanna ti serbisio medikal.
Inbatadna a gapu iti daytoy ket dagusda a napan kinita ti maseknan a pasyente ken tinawaganda ti Municipal Health Office tapno maipadanon daytoy a banag kadakuada tapno maisalbar ti biag ti pasyente.
Kunana nga apaman a nakasangpet ti ambulansia ti MHO ket napugsatanen ti anges ti pasyente.
Nupay kasta, inbagana nga inkarigatanda latta nga intaray daytoy iti ospital tapno awan ti makuna ti pamilia ti maseknan.
Mainaig iti daytoy, inpalgakna a sakbay pay a naipan iti Quarantine Facility ti maseknan ket naikabil iti ospital gapu iti sagsagabaenna a sakit nga asthma.
Innayonna a manamnama a rumuar koman iti kabigatan ti pasyente idi napasamak daytoy gapu ta maika-13 nga aldawnan iti quarantine ngem bigla lattan a narigatan nga umanges.
