LAOAG CITY – Dead on arrival iti Mariano Marcos Memorial Hospital and Medical Center ti maysa a senior citizen kalpasan a nadungpar ti motorsiklo iti Manila-North road, bisinidad ti Barangay Bil-loca iti ciudad ti Batac.
Nabigbig daytoy a ni Mr. Renato Madriaga y Galzote, 66, naasawaan ken residente iti nasao a barangay idinto a ti nakadungpar ket ni Silvestre Albertson Baguio y Resurrection, 31, ken residente iti Barangay 11, San Fernando iti ili ti San Nicolas ken ti lubbon na a ni Ara Villasan y Corpuz, 22 ken residente iti Barangay Parangopong iti nadakamat a ciudad.
Basar iti imbestigasyon ti PNP-Batac, agpapaabagatan a direksyon da Baguio idi nadungpar na ti lumasat a ni Madriaga a nangitunda ti pasamak.
Gapo iti daytoy, nagsagaba ti biktima ti sugat iti nagduduma a paset ti bagi na kangrunaan ti ulo na a rason ti pannakatay na idinto a ni Baguio ket nasugatan ti ulo na ken ni Villasan ket sugat iti akin-kannawan nga ima na.
Naamoan a dagiti nakadungpar kenni Madriaga ket manarimaan met a maag-agasan iti ospital gapo kadagiti sinagaba da a sugat.
