LAOAG CITY – Natay ti maysa a Senior Citizen kalpasan a tinagbat ti bukudna a kaanakan iti Brgy. Escoda iti ili ti Marcos.
Segun ken ni P/Maj. Jomar Andres, Hepe ti Marcos Municipal Police Station, nabigbig ti biktima a ni Florendo Lorenzo, agtawen iti 61 idinto a nabigbig met ti suspek a ni Reymundo Fernando Lorenzo, agtawen iti 54 nga agpada dagitoy a residente iti nasao met laeng a barangay.
Inbatadna a basar iti inwayatda nga imbestigasion, kabayatan nga agiinum ti biktima ken suspek iti pagtaengan ti pagayamda a ni Hilario Malapit ket adda ti saan a panagkikinnaawatan dagiti dua a nangitunda ti panagririda.
Inlawlawagna a gapu iti kinabartek dagiti dua ket adda ti naisawang ti suspek a saan a napintas a sarita banag a kinagura ti biktima.
Gapu iti daytoy, kunana a nagawid ti suspek iti pagtaenganda ngem kalpasan ti agarup 20 a minuto ket sinaruno ti biktima no sadinno a naminsan manen a nagbinnarada agingga a nagkabil dagitoy.
Inpalgakna a napan nangala ti buneng ti suspek iti luganna a kurong-kurong nga isu ti inusarna a pinangtagbat iti biktima.
Kunana nga idi napan nagresponde dagiti kameng ti Philippine National Police, Bureau of Fire Protection ken dagiti medical personnel ket nakitada a nakapakleb ti biktima nga arig ket agdigdigus ti bukudna a dara.
Mainaig iti daytoy, inpakaammo ni P/Maj. Andres a dagus a naitaray ti biktima iti Doña Josefa Edralin Marcos District Hospital ngem naideklara a dead on arrival babaen iti attending physician.
Naammoan a natagbat iti akin-kannigid a tengnged ti biktima babaen iti buneng nga agatiddug ti walo a pulgada ken addan ti dati a susik iti nagbaetan ti biktima ken suspek.
Innayonna a desisido a mangipila ti kaso ti pamilia ti biktima kontra iti kabagianda met laeng a suspek iti pannakatay ti miembro ti pamiliada.
Kabayatanna, manamnama a mapilaan ti kaso a Murder ti suspek ita nga aldaw.
