LAOAG CITY – Balligi a naisayangkat ti Serbisyo Caravan iti paset ti Surong Valley, Brgy. Dagupan iti ili ti Vintar.
Daytoy ket kalpasan ti naiget a panagbibinnulig ti Office of the Municipal Civil Registrar, Department of Social Welfare and Development ken ti Local Government Unit iti nasao nga ili.
Babaen iti daytoy, nangipaay ti Philippine Statistics Authority, Municipal Civil Registrar, Public Attorney’s Office ken ti Department of the Interior and Local Government ken dadduma pay dagiti nagduduma a serbisio kadagiti umili.
Mainaig iti daytoy, segun ken ni Mayor Richard Degala a napintas daytoy nga addang ti lokal a gobierno tapno mas ad-adda a maiyasideg kadagiti residente ti tulong a maidiaya kadakuada nangruna kadagiti addaan ti nadadagsen a parikot iti panagbiagda.
Kabayatanna, inpakaammo ti Mayor a sumaruno a pakaisayangkatan ti nasao a programa ket iti Pallas Valley iti ili ti Vintar.
