LAOAG CITY – Manamnama a dakkel ti pagbaliwan dagiti maididiaya a serbisio iti Gov. Roque B. Ablan Sr. Memorial Hospital wenno GRBASMH.
Segun ken ni Dr. Rogelio Balbag, executive director ti Ilocos Norte Hospital Management Council kalpasan ti inagurasyon ti expansion ti Out Patient Department wenno OPD Building ti ospital ket addanton ti pagyanan dagiti interesado a mangipaay ti serbisioda iti uneg ti hospital a sub-specialist kas iti rehab medicine, cardiology, orthopedic surgery ken dagiti dadduma pay nga espesialista.
Inbatadna nga adda pay dagiti nagdumaduma nga espesialista a nangipripirip iti tarigagayda nga ag-practice iti ospital.
Mamati ni Balbag a nasaysayaat no maaddaan ti kabukbukudan a kuarto iti hospital dagiti private consultant ti hospital Inbunannagna nga agkasapulan pay ti hospital ti “nephrologists” para iti operasyon ti “dialysis center.”
Kabayatanna, nagyaman ni Balbag ken ni Gob. Matthew Marcos Manotoc iti panangikalikagumna a maipasdek ti expansion ti Out Patient Department Building ti nasao a ospital.
Malaksid iti gobernador, impadanonna pay ti panagyamanna iti Department of Health a nangipaay iti nausar a pundo para iti nasao a proyekto.
Inlawlawagna a ti nasursuruk ngem sangapulo a milyon a pisos a nausar iti pannakaipasdek ti expansion ti Out Patient Department Building ket paset iti inpaay ti Department of Health a limapulo a milyon a pisos nga inkiddaw ti gobernador itay kallabes iti babaen ti health facility enhancement program.
Kunana a karaman pay ditoy ti pannakatarimaan ti dialysis center ken dagiti infra projects kas iti pavement ti hospital.
Manamnama a maipatungpal amin dagitoy iti kabiitan a panawen para iti pannakaipaay ti nasaysayaat a serbisio kadagiti kakailian.
