LAOAG CITY – Kinumpirmaran mismo ni Presidente Ferdinand Marcos Jr. a pirmaanna ti nailungalong a gakat a pannakaitantan ti Barangay ken Sangguniang Kabataan Elections.
Daytoy ket kagiddan ti rakurak ti Commission on Elections nga awanen ti formal signing ceremony para iti gakat ken posible nga ag-lapse into law laeng daytoy.
Inlawlawag ti Presidente a masapul a tutukan ti kaunaan a parliamentary elections ti Bangsamoro Autonomous Region in Muslim Mindanao (BARMM) inton Oktubre para iti kinakappia iti Mindanao.
Inbatadna a kaliplippas laeng ti midterm elections ken mismo ti Commission on Elections ti nangibaga nga agbalin a nadagsen iti panaggigiddan ti tallo a dadakkel nga eleksion iti uneg ti ababa a panawen.
Kunana nga agbalin a conflict ti linteg iti desision ti Korte Suprema a saan a mabalin nga iyababa ti termino dagiti barangay officials gapu ta ad-adda pay nga umatiddog ti termino dagitoy iti pannakaitantan ti eleksion.
Gapu iti daytoy, maiyakar ti Barangay ken Sagguniang Kabataan Elections inton Nobiembre 2026.
Maiyalud-od pay ti termino ti Barangay ken Sagguniang Kabataan officials iti uppat a tawen no sadinno a dua a four-year term para kadagiti barangay captain ken kagawad ken maysa a four-year term met para kadagiti Sagguniang Kabataan officials.
