LAOAG CITY – Balligi iti panakaiwayat ti site inspection iti Sta.Monica church iti ili ti Sarrat.
Daytoy ti inpakaammo ni Mr. Marvin Ganal, ti mangidadaulo ti Municipal Disaster Risk Reduction and Management Office iti nasao nga ili.
Segun kenni Ganal, naisayangkat ti site inspection tapno makita iti perdisyon ti nasao a simbaan gapo iti ginginned a napasaran ditoy probinsiya iti napalabas a tawen ken tapno maamwan no mano ti pondo a maiyalokar para iti panakatarimaan na.
Inbatad na a ti regional project validation and evaluation team ket bukbuklen ti Office of the Civil Defense, Department of the Interior and Local Government, Department of Public Works and Highways, National Economic and Development Authority, Department of Information and Communications Technology ken Department of Tourism.
Innayon na pay a ti naisayangkat nga inspection ket kiniddaw ti National Commission for Culture and the Arts, ken kalpasan iti daytoy ket manamnama a mailatangan ti pondo a 116-milyon a pisos manipod iti Historical Commission.
Inpakaammo ni Ganal a malaksid iti daytoy ket immunan a nangipaay ti 40-milyon a pisos ti National Historical Commission para iti phase 1 iti pannaka-renovate ti nasao a simbaan.
Namnamaen na a babaen kadagitoy nga addang ket maisubli ti kinapintas ti simbaan ken dumteng ti panawen a mailukat ti manen daytoy para iti publiko aglalo kadagiti romano katoliko.
Maipalagip nga idi napalabas a tawen ket dinayyeg ti napigsa a gingined ti probinsiya a nangitunda ti panagrikki iti sumagmamano a paset ti simbaan.
Gapo iti daytoy, inrekomendar ti Municipal Disaster Risk Reduction and Management Office nga awan paylaeng ti maisayangkat a misa iti uneg ti simbaan gapu ta narisgo no sadinno nga amin dagiti aktibidad ket maipatungpal iti garden.
