LAOAG CITY – Kinumpirmaran ni Brgy. Chairman Jessie Cris Lagundino, ti Brgy. Pancian iti ili ti Pagudpud a temporario a napaserraan iti paset ti Sitio, Banquero, Brgy. Pancian iti nasao nga ili gapu iti panagreggaay ti daga gubuay iti epekto ti Bagyo Kristine.
Gapu iti daytoy, inbatad ni Kapitan Lagundino nga adda dagiti sumagmamano a motorista ti na-stranded ken nagur-uray iti pannakawaknit ti daga a nakaabbeng iti kalsada.
Inlawlawagna a saanda pay laeng a gandaten ti dumalyasat iti nasao a kalsada tapno maliklikan ti aniaman a saan a napintas a mapasamak nangruna ket adda dagiti gundaway a kellaat a pumigsa ti tudo ken angin a mangitunda ti pannakaikabil ti risgo dagiti umili.
Innayonna nga agtultuloy ti panangmonitorda iti situasion iti lugarda babaen iti pannakikoordinarda kadagiti dadduma a maseknan nga ahensia ti gobierno.
