LAOAG CITY – Inbatad ni Brgy. Chairman Nick Baldoz nga inlockdown da a dagus iti sitio dos iti Barangay Mabusag Norte iti ili ti Badoc kalpasan nga adda ti maysa a residente iti lugar a nagpositibo ti covid-19.
Segun ken ni Baldoz, ti pasyente ket agtawen ti 28 a lalaki ken nurse iti Mariano Marcos Memorial Hospital and Medical Center iti ciudad ti Batac.
Inpakaammo ti kapitan a gapu ta nakalockdown iti nasao a sitio ket awan dagiti mapalubusan a residente a rumuar malaksid no emergency.
Mainaig iti daytoy, kuna ni Baldoz a dagiti kabbalay ti nasao a pasyente ket nai-quarantine ken dumalan amin ti swab test.
Mainaig iti daytoy, inbaga ti kapitan a ti sumagmamano a miembro ti pamilya ti pasyente ket napanda naki-birthday iti barangay dos iti met laeng nasao nga ili sakbay a naamoan a positibo ti nurse ti covid-19.
Kabayatanna, kuna ni Baldoz nga inbilin ni Mayor Maximo Cajigal iti ili ti Badoc a dagiti residente iti barangay da nga agtrabtrabaho iti munisipyo ket ag-work from home da pay laeng.
Inpasingked met ti kapitan nga ar-aramiden amin ti lokal a gobierno iti panangidaulo ni Mayor Cajigal ti kabaelan da tapno malabanan da ti nasao a virus.
Innayon na a kas paset ti lockdown ket amin a kasapulan dagiti residente iti lugar ket ilista da tapno isuda nga opisyal ti barangay ti mapan aggatang.
Ti nurse a positibo ti covid-19 ket agdama a naka-confine iti ospital iti ciudad ti Batac.
