LAOAG CITY – Natalged a pagluganan ti Skypasada nga agturong idiay Basco, Batanes.
Daytoy ti inpasingked ni Atty. Athena Nicolette “Nikki” Pilar, ti mangidadaulo iti Metro Ilocos Norte Council.
Siraragsak a nangipakaammo a maibilang a kanayon a napunno ti flight a Basco-Laoag ken Laoag-Basco nangnangruna no ti pagbasaran ket ti puntiriada a sangapulo a pasahero ken mainayon ti bagahe a karga ti eroplano agsipud ta agawat pay dagitoy ti bagahe a maipatulod idiay Batanes.
Inlawlawagna a saan met a makuna a bassit unay ti eroplano rason nga awan ti rumbeng a pagdanagan dagiti aglugan.
Malaksid iti daytoy, kunana nga adda pay ti plano ti Skypasada nga agusar ti Seaplane tapno awan ti pagamkan dagiti pasahero nga aglugan nangnangruna no panawen ti panagtutudo.
Inbatad ni Pilar ti naituding a biahe ti Skypasada manipod iti Laoag International Airport nga agturong idiay Basco ket alas otso ti bigat iti tunggal aldaw ti Lunes, Mierkoles ken Biernes.
Kabayatanna, inlawlawagna nga iti panag-courtesy call dagiti agpapaay iti Skypasada nga indauloan ti agtagikua a ni Gob. Ramon V. Guico III ti Pangasinan a ti kangrunaan a dinamag ni Gob. Matthew Marcos Manotoc ket ti plete gapu ta ammona a daytoy ti kangrunaan a pakaseknan dagiti umili.
Kuna ni Pilar nga inpakaammo ni Guico ken ni Gob. Manotoc a 7,500 ti agturong idiay Batanes a kaipapananna a 15 ribu a pisos ti mapan ken agawid karamanen dagiti buis a masapul a mabayadan.
Innayonna nga inpatalged ti gobernador ti Pangasinan a nalaklaka nga amang ti plete a Basco-Laoag ngem ti agdiretso dagiti pasahero idiay Manila nga umabot iti magasto iti duapulo ribu agingga iti duapulo ket lima ribu a pisos.
