LAOAG CITY – Manamnama a mangrugi ti operasion ti pannakalukat ti SM ditoy siudad ti Laoag inton bulan ti Disiembre ita a tawen 2024.
Segun ken ni Mayor Michael Marcos Keon ditoy siudad ti Laoag, basar iti obserbasionna ket alisto ti pannakaipasdek ti dakkel a mall ditoy siudad a posible a mangrugi nga aglukat sakbay nga agngudo iti agdama a tawen.
Inbatadna a gapu iti manamnama nga umirot ti taray iti trapiko kagiddan ti panangrugi ti operasion ti dakkel a mall ket adda ti manarimaan a plano nga ad-adalen ti lokal a gobierno tapno maalay-ayan ti kinaadu dagiti lugan a dumaldalyasat iti lugar.
Inlawlawagna a ti maaramid a kalsada nga agturong iti SM ket dumalan iti Padsan River agingga iti bypass road ditoy siudad ti Laoag no sadino agarup maysa a bilyon a pisos ti nailatang a pundo.
Kunana a naiget ti pannakikoordinarda iti opisina ni Ilocos Norte 1st District Rep. Sandro Marcos ken ti Department of Public Works and Highways 1st District Engineering Office pakaseknan iti nasao a proyekto.
Innayonna a nasken laeng nga agsapolda ti dadduma pay a wagas tapno maliklikanto ti panagdudupudop dagiti naruay a tattao apaman a pormal a mangrugi ti operasion ti SM.
