LAOAG CITY – Inlawlawag ni Miss Mercy Anne Arzadon, ti OIC Nutritionist Dietitian II iti Mariano Marcos Memorial Hospital and Medical Center (MMMHMC) iti ciudad ti Batac dagiti possible a mapasamak no masobraan ti agdiyeta ken agehersisyo.
Inbatad ni Arzadon a saan a mabalin nga agfasting iti nasursurok ngem 14 agingga iti 16 nga oras.
Segun kenkuana, masapol a saan a libtawan ti mangan ngem bassi-bassit laeng ti kanen.
Inpetteng na a no libtawan ti mangan ken masobraan ti panagbisin ket possible nga ad-adon to ti kanen.
Kuna na pay a no agpasar ti nakaro a bisin gapu iti sobra a panagdiyeta ket mabalin nga agbaliw ti sistema ti panagdigest ti bagi, agpasar ti pannakaulaw, mapukawan ti poot, saan a maiconcentrate dagiti ar-aramiden kangrunaan no adda iti trabaho wenno iti pagadalan para kadagiti estudyante.
Innayon na nga iti met panag-ehesisyo ket masapol a saan a nalablabes ngem 30 a minuto gapu ta saan a napintas no masobraan.
Immun-una iti daytoy, nairekord ti 27-milyon a Pilipino ti obese wenno overweight ditoy pagilyan.
Inbalakad ni Arzadon a no sobra ti timbang ket masapol a mawagwag ti bagi, saan a mabalin nga agtugtugaw ti nabayag imbes ket mangkita ti mabalin nga aramiden tapno ma-exercise ti bagi.
