LAOAG CITY – Naipangruna ti panangsurot dagiti beach goers ti social distancing kadagiti resort ditoy siudad ti Laoag.
Segun kenni Police Lt. Col. Rafael Lero, hepe ti PNP Laoag, babaen iti koordinasyon da kadagiti maseknan a barangay ken iti agtultuloy a panagmonitor ket nasurot ti social distancing ken dadduma pay a health protocols.
Sinaludaran ni Lero dagiti opisyal ti barangay ti kooperasyon da tapno mapagtalinaed a natalged dagiti umili manipud iti COVID-19.
Kuna na a ti maseknan a barangay met laeng ti madaksan no saan a napintas ti pannakaipatungpal ti social distancing.
Mainaig iti daytoy, nalimitaran dagiti grupo nagturong kadagiti picnic grounds.
Nakikoordinar met ti tourism office ken ti BPLO kadagiti nagduduma a resort mainaig kadagiti masurot a paglintegan.
Agtultuloy ti panagmonitor ti PNP dagiti mabigbig a picnic grounds kas iti Brgy. Caaoacan, iti Sabangan iti Lapaz, Navotas, ken iti Brgy. Calayab ditoy siudad ti Laoag.
