LAOAG CITY – Pinasingkedan ni Mr. Jomer Salvador, presidente iti assosasyon dagiti mannalon iti ili ti San Nicolas a dakkel a tulong kadakuada a mannalon ti naestablisar a solar irrigation.
Segun kenni Salvador, adda dagiti naestablisar a 69 a solar panel nga agukkon ti inerhiya a mausar a mangpawerret iti makina a mangiyuli ti danum manipud iti waig ken maikarga iti tangke.
Addaan iti dua a gate valve wenno walo nga outlet a mabalin na a pasayakan ti 10 agingga iti 15 nga ektarya a kataltalonan.
Inlawlawag ni Salvador a saannga aggegeddan a malukatan amin dagiti outlet tapno napigpigsa ti danum a bumaba manipud iti tanke.
Malukatan laeng ti maysa a gate valve nga addaan iti uppat nga outlet tapno napinpintas iti panangsuplay na ti danum kadagiti kataltalonan.
Nagyaman ni Salvador iti DA gapu ta nangipatakder da iti nasao a fasilidades.
Iti mainaig a damag, kinumpirmaran ni Salvador a napintas ti bunga dagiti mula na a mais gapu iti umiso a pannakapadanum na.
Kuna na nga adda dagiti sagdudua ti bunga na iti maysa poon dagiti mula na a mais.
Segun kenni Salvador, nakissayan payen iti trabaho da iti taltalon gapu ta idi awan pay ti nasao a proyekto ket agpatingga da nga agpadanum iti rabii.
Mainaig iti daytoy, adda met iti schedule iti panagusar da ti nasao a ramit.
Maipalagip nga idi Hunyo 2019 nga inestablisar ti Department of Agricultureti nasao a proyekto babaen iti panangipatungpal ti DA Region 1.
