LAOAG CITY – Pinaltugan dagiti soldado ti Myanmar ti Chinese aid convoy a mapan agikabil ti supply iti lugar a naapektaran ti magnitude 7.7 a gingined.
Daytoy ket gapu ta maipagarop a saan a naipakaammo kadagiti soldado ti Myanmar a magna ti convoy ti China iti lugar.
Immunan a nagkedkedan ti military leader a ni Min Aung Hlaing ti panawagan ti armed rebel groups para iti pannakaipatungpal ti ceasefire tapno nawaya dagiti mapan agidanun ti tulong kadagiti lugar a naapektaran ti napigsa a gingined.
Nupay kasta, inpaganetget ni Hlaing nga itultuloy da ti mangbomba kadagiti lugar a naapektaran ti gingined kas paset iti ipatpatungpal da a security measures.
Iti agdama, umaboten iti 2,700 a tattao ti natay idinto a ginasut a sabsabali dagiti nasugatan iti napigsa a gingined idiay Myanmar.
