LAOAG CITY – Maminsan manen a sumango ti Office of the Solicitor General kas counsel dagiti opisial ti gobierno a respondents iti petision nga inpila da dati a Presidente Rodrigo Duterte ken Senador Bato dela Rosa iti Korte Suprema.
Daytoy ket kalpasan ti desision idi ti Office of the Solicitor General iti babaen ti dati a Solicitor General Menardo Guevarra a saan a nangibagi para iti gobierno iti petision a mangkukuestionar iti hurisdiksion ti International Criminal Court mainaig iti pannakaarestar ken panangikabil ken ni Duterte idiay The Hague, Netherlands.
Basar iti kopya ti manifestation nga inpila ti Supreme Court, ti Office of the Solicitor General nga idadauluan ita ni Solicitor General Darlene Berberabe ti agserbi manen a counsel kadagiti respondents.
Sakbay ti panagsubli ti Office of the Solicitor General, ti Department of Justice ti mangibagbagi kadagiti opisial a respondents iti kaso.
Kabayatanna, nangipasan ti komento dagiti respondents iti petision da Duterte ken Dela Rosa nga agkidkiddaw ti panangilawlawag no rumbeng a makitinnulong latta ti Pilipinas iti International Criminal Court uray pormalen daytoy a nagikkat.
Kiniddawda nga ibasura ti very urgent manifestation ni Dela Rosa gapu iti maipagarup a kinakurang ti merito.
Nangipila ni Dela Rosa ti petision tapno lappedan ti posible a panangarestar kenkuana ti International Criminal Court kalpasan nga inrakurak ni Ombudsman Jesus Crispin Remulla nga iggemnan ti kopya ti arrest warrant kontra iti senador.
