LAOAG CITY – Binagkong ti maysa a Musician ti Sound System Crew iti Barangay Valbuena iti ili ti Pinili.
Nabigbig ti biktima a ni John Arnold Daguimol y Santos, agtawen ti 32, naasawaan ken residente ti Barangay Salanap iti ili ti Pinili idinto a nabigbig ti suspek a ni Ronaldo Pagdilao, agtawen ti 53, awanan asawa ken residente ti Barangay Valbuena iti nasao met laeng nga ili.
Basar iti Pinili Municipal Police Station, simrek ti biktima iti Amphi-Theater tapno ited ti kuarta iti anakna a ni Prince Ivan Daguimol ngem simmurot ti suspek ken induronna ti biktima.
Gapu iti daytoy, bimmales ti biktima babaen ti panangdanog iti suspek ngem nakalisi daytoy.
Nangiruar ti kitchen knife ti suspek manipud iti siketna ken apaman a nakita daytoy ti biktima ket insigida a timmaray.
Nupay kasta, natulid ti biktima isu a napan kinamat ti suspek ken binagkongna ti namindua a daras iti akinkannawan a kimmotna.
Naitaray ti biktima iti Karmelli Clinic and Hospital Inc. para iti naan-annay a pannakatamingna ngem naiyakar daytoy iti Mariano Marcos Memorial Hospital and Medical Center iti siudad ti Batac idinto a naarestar ti suspek iti pagtaenganda.
Naammoan a rumrummuar iti imbestigasion dagiti otoridad a ti motibo iti insidente ket gapu iti dati a susik iti nagbaetan ti biktima ken ti suspek.
Iti agdama, agtultuloy ti maiwaywayat nga imbestigasion maipanggep iti napasamak nga insidente.
