LAOAG CITY – Agimbestigar ti gobierno ti South Korea iti potensyal a pannakalabsing ti human rights kabayatan ti inpatungpal a raid ken panangibalud dagiti otoridad iti Estados Unidos kadagiti Korean workers.
Inbatad dagiti otoridad iti South Korea a makikoordinar da kadagiti mapagtalkan a kompanya para iti panagimbestigar da iti aniaman a potensyal a pannakalabsing ti human rights ken dadduma pay nga isyu mainaig iti napasamak kadagiti South Korean nationals nga agtrabtrabaho iti electric vehicle battery plant iti estado ti Georgia idiay Estados Unidos.
Ti napasamak a panagraot ket nangitunda ti tensyon iti nagbaetan ti Estados Unidos ken South Korea no sadinno a daytoy ket subuken na ti relasyon ti dua a pagilian.
Malaksid iti daytoy, nagballaag pay ni South Korean President Lee Jae-myung a mabalin nga ibabawi dan ti foreign investment iti Estados Unidos.
Inawagan na pay ti sitwasyon kas “bewildering”, no sadinno nga inpetteng na a naipagagangay para kadagiti kompanya ti South Korea a mangipatulod da kadagiti trabahador da tapno tumulong kadagiti overseas factories.
Maipalagip nga inrakurak ti Hyundai iti kallabes a ti planta ket maitantan ti panaglukat na iti uneg ti dua a bolan.
Kabayatanna, nagpanawagan dagiti Trade Unions iti South Korea a masapol nga agpadespensar ni US President Donald Trump kalpasan ti napasamak.
Maipalagip nga inbalud dagiti US officials ti 475 nga indibidual no sadinno nasurok a 300 ditoy ket South Korean nationals kalpasan a naduktalan nga illegal ti panagtrabtrabaho da iti battery facility, ti maysa kadagiti kadakkelan a foreign investment projects iti estado.
