LAOAG CITY – Nangpanday ti Sangguniang Panlalawigan ti resolusion maipanggep ti panagkiddaw ti probinsia iti Energy Regulation Commission wenno ERC ken National Electrification Administration (NEA) a maimbestigar ti nangato a singir ti kuryente ditoy Ilocos Norte.
Nakaipalaon ti nasao a kopya ti resolusion ket ti panagbaliw ti presio ti kuryente a saan a naipasakbay a naibaga ken naipalawag kadagiti mismo a consumers.
Ti Ilocos Norte Electric Cooperative wenno INEC ti agsingsingir ti electric charges kadagiti consumers agingga ti panagngato ti generation charges a binulan a bill ti coal fired power plant wenno ti Masintoc Power Partners Company Limited, a maibilang a power generation supplier ti nadakamat a kooperatiba.
Nailanad pay ti panagrigrigat dagiti member-consumers idinto a dagiti opisial ken board of directors ti nasao a kooperatiba ti maipagarup nga agtultuloy a maik-ikkan ti dakkel a sweldo sabali pay dagiti dakkel a kantidad nga allowances a mait-ited kadakuada.
Makweskwestionaran pay ti pannakaibusbos ti kwarta ken pannakaipursige dagiti kontrata iti nasao a kooperatiba a nayun a padagsen dagiti consumers.
Patyen ti Sangguniang Panlalawigan a babaen ti ERC ken NEA a makatulong dagiti dua a nadakamat nga ahensias ti gobierno a mangkita ti operasion ti INEC nangruna ti panangkita ti maiyataday a panagsingir ti INEC.
Ti kopya ti resolusion ket pinaboran dagiti agpanpanday linteg iti pannakaaprobarna kabayatan ti Regular Session.
Inrekomendar ni Sangguniang Panlalawigan Member Atty. Franklin Dante Respicio ti nasken a pannakaiyuman iti opisina ni Governor Matthew Marcos Manotoc iti linaon ti naidasar a Corporate Social Responsibility wenno CSR ti Renewable Energy Corporation tapno maadal a nasayaat no kasapulan dagitoy.
Basar ti linaon ti CSR, umabot ti 16.9Million pesos ti kadagupan a gatad ti mailunglungalong a CSR ken daytoy ti manamnama a maiyimplementar inton tawen 2024 agingga 2026.
Umabot ti nasurok 8Million pesos ti mausar wenno maited a pagsayaatan para kadagiti negosiante idiay Pagudpud idinto a 4.5Million pesos met ti mapan iti LGU Pagudpud ken ti probinsia a nakaidagupan daytoy ti nasurok 16.9Million Pesos.
Nopay kasta, inlawlawag ni Atty. Respicio a masapol a ti maseknan a kompanya ti Amihan Renewables ket maiyuman iti opisina ti gobernador gapu ta maysa isuna kadagiti makakita no kasapulan ken maibilang a prioridad dagiti nakaipalaon ti CSR.
Ti Sangguniang Panlalawigan ti mangaprobar ti linaon ti CSR babaen ti ordinansa pakairamanan pay ti pannakaiendorsar ti proyekto ti nasao a kompanya babaen resolusion ngem agpannuray daytoy iti panangadalda.
