LAOAG CITY – Impasigurado ni House Speaker Faustino Dy III ti inisiatibo ti Kongreso nga awan ti probinsia a mabati iti aspeto ti edukasion, nutrision ken rural development.
Segun kenkuana, daytoy ti planplanoen ti Kamara tapno masigurado nga amin a lugar ti pagilian ket mabenepisiaran kadagiti panagdur-as nga ipatpatungpalda.
Mainaig iti daytoy, dinakamat ni Dy dagiti gakat a naaprubaran iti edukasion kas ti Government Assistance to Students and Teachers in Private Education (GASTPE) Program, panangipapigsa ti Last Mile School Program ken ti gakat a National Nutrition Program a gagemna daytoy a maipatungpal dagiti feeding program kadagiti pagadalan para kadagiti estudiante.
Malaksid kadagitoy, impasigurado pay ni Dy dagiti inisiatibo a mangitunda ti agpapantay ken agsasabay a panagdur-as aglalo kadagiti lugar a saan laeng iti Metro Manila no diketdi iti pay ruarna.
