LAOAG CITY – Inbilin ti Supreme Court ti Office of the Court Administrator a bantayan dagiti kaso nga adda ti pakainaiganna iti korapsion kadagiti infrastructure projects nga ipila kadagiti Regional Trial Court.
Basar iti Korte Suprema, no bilang adda ti maipila a kaso, mangdutok ti special courts nga isu ti mangtutok iti panagdengngeg ken panangresolbar kadagiti adda ti pakainaiganna kadagiti maanomalya nga infrastructure projects.
Daytoy ket kas paset iti pannakaipatungpal ti Strategic Plan for Judicial Innovations a gagem a papigsaen ti transparency, efficiency ken accountability iti hudikatura iti babaen ti digitalization programs kas ti eCourt PH.
Sakupen dagitoy a reporma ti amin a tukad ti korte manipud kadagiti trial courts agingga iti Court of Appeals, Sandiganbayan, Court of Tax Appeals ken mismo a Supreme Court.
Gagem ti programa a solbaren ti problema ti nabayag a panagdur-as kadagiti kaso ken backlog kadagiti korte kabayatan a maipalpalawa ti access iti hustisia para iti amin.
