LAOAG CITY – Kalikagom ti Sports Development Office ti mangestablisar ti Indigenous People Games ditoy probinsya.
Segun ken ni Miss Helen Rose Domingo, ti mangidadaulo iti Sports Development Office iti kapitolyo probinsyal, gagem ti nasao nga addang ket tapno ad-adda pay a maikkan ti importansya dagiti Indigenous People, karaman ti kultura ken tradisyon dagitoy.
Inbatad na a saanen a baro daytoy iti pagilian ngem ditoy probinsya ket arigna maiyam-ammo paylaeng.
Inlawlawag ni Domingo a dagiti ay-ayam kas ti kadang-kadang race, panagtiliw ti baboy, archery, ken dadduma pay ket maipakita no kasanu ti panagbiag dagitoy.
Maipalagip nga adda dagiti Indigenous People nga agnanaed ditoy probinsya, partikular iti ili ti Nueva Era, Carasi, Dumalneg, Adams ken Vintar.
