Inlibak ti Sugar Regulatory Administration (SRA) ti kinuna ti sumagmamano a grupo nga adda sobra a suplay ti asukar ditoy pagilian.
Segun ken ni Sugar Regulatory Administration Administrator Pablo Luis Azcona, nababbaba ti produksion ti refined sugar ita a Nobiembre, a nakadanon laeng iti 26,279 metric tons (MT), wenno 61 percent no idasig iti 67,053 MT idi napan a tawen.
Kinuna ni Azcona nga umdasen ti buffer supply ti ahensia a mangtaming iti kurang a supply.
Segun iti Sugar Regulatory Administration, saan a kasapulan ti panagangkat ti asukar agingga iti panawen ti panaggiling inton Mayo wenno Hunio 2025.
Kabayatanna, kinuna ni Agriculture Secretary Francisco Tiu Laurel Jr. nga umdasen ti lokal a suplay para iti agdama a tawen ti apit isu a naitantan ti panagangkat.
