LAOAG CITY – Inbasura ti Korte Suprema ti petition for certoriari nga inpila ti contractor a ni Sarah Discaya kontra iti opisial ti Office of the Ombudsman ken ni Department of Public Works and Highways (DPWH) Secretary Vince Dizon.
Daytoy ket mainaig iti sangsangoen ni Discaya a panaglabsing iti Anti-Graft and Corrupt Practices Act ken Malversation Through Falsification of Public Documents mainaig kadagiti maanomalya a flood control projects idiay Davao Occidental nga inpila ni Dizon.
Iti nagbalin a sesyon ti Supreme Court En Banc, pinatibker ti Korte Suprema ti immuna a findings ti Office of the Ombudsman a nakita nga adda ti umdas a probable cause tapno pilaan ti kaso ni Discaya.
Inbatad ti Korte Suprema a moot wenno awanen ti serbi ti petision ni Discaya kalpasan a naisubmitiren dagiti impormasion iti Regional Trial Court ken mangiparuk-aten ti warrant of arrest kontra kenkuana.
Ak-akusaran ti kompania ni Discaya a St. Timothy Construction Corporation nga immawat ti pakabuklan a bayad para iti concrete revetment iti Jose Abad Santos uray saan met pay a nalpas ken nagresulta iti panangallilaw iti gobierno.
Malaksid ken ni Discaya, kinasoan met idi ni Dizon dagiti opisial ti Department of Public Works and Highways Davao Occidental District Engineering Office.
