LAOAG CITY – Inbasura ti Sandiganbayan Third Division ti maikadua a kiddaw ni Bong Revilla a maiatras ti kasona nga iggem ni Associate Justice Karl Miranda.
Iti resolusion a napetsaan Setiembre 24, impetteng ni Revilla a posible nga adda pabpaboran ni Miranda gapu iti kabsatna a ni Atty. Buenaventura Miranda, a nagbalin nga abogado ti prosecution witness a ni dati a Department of Public Works and High Ways (DPWH) Undersecretary Roberto Bernardo.
Kinuestionaran pay ti kampo ni Revilla ti nagbalin a dissenting opinion ni Miranda iti bail application ken dagiti rakurak daytoy mainaig iti Good Conduct Time Allowance wenno GCTA no sadinno a mabalin a nangipaay ti impresion ti desision ti kaso.
Nupay kasta, inbatad ti korte nga awan ti nalawag ken umno nga ebidensia ti bias. Nailawlawag pay a ni Bernardo ket testigo laeng ken saan a paset ti kaso, bayat a ti panangibasa ni Miranda iti Good Conduct Time Allowance ket panangilawlawag laeng iti karebbengan dagiti akusado.
Gapu iti daytoy, agtalinaed ni Justice Miranda iti Third Division ken agtultuloy iti panagdengngeg ti kaso ni Revilla.
