LAOAG CITY – Naideklarar ti State of Calamity iti ili ti Solsona.
Daytoy ket kalpasan a kiniddaw ni Mayor Joseph De Lara iti konseho iti ili ti Solsona ti pannakaideklarar ti State of Calamity gapu ti kaado dagiti perdisyon nga inbati ti Bagyo Egay agingga iti Bagyo Goring.
Inlawlawag ni Vice Mayor Jonathan De Lara nga inaprubaran da a dagus ti resolusyon para iti pannakaideklarar a maikabil iti babaen ti State of Calamity iti ili ti Solsona tapno matulungan dagiti residente kangrunaan na ket adda pay ti dua a barangay a nagtalinaed nga isolated.
Segun iti bise mayor, dagiti nagtalinaed nga isolated ket iti Barangay Nalasin ken Barangay Lipay kalpasan a naperdi ti dalan a mapan kadagiti nadakamat a lugar gapu iti kinadakkel ti danom.
Kuna na a babaen iti pannakaideklarar ti State of Calamity iti ili ti Solsona ket mausar da ti Calamity fund tapno al-alisto a matulungan dagiti umili.
Mainaig iti daytoy, inkalintegan ni Mayor De Lara a nupay awanen ti bagyo ket kasapulan da latta ti calamity fund a pangtulong da kadagiti kailian da a kangrunaan a naapektaran.
