LAOAG CITY – Naideklara ti state of emergency iti rehion ti Kurks idiay Russia gapu iti agtultuloy a panangraut dagiti tropa ti Ukraine iti cross-border.
Segun iti agdama a gobernador ti rehion a ni Alexei Smirnov, kasapulan daytoy kas addang tapno maliklikan ti nakarkaru a pagbanagan ti panangraut iti rehionda.
Maibasar kadagiti opisial ti Russia, 5 a sibilian ti natay idinto a 31 ti nairekord a nasugatan, ken 6 kadagitoy ti ubbing sipud idi nangrugi ti panangraut dagiti tropa ti Ukraine.
Saan pay a nangiruar ti Ukraine iti opisial a statement maipapan iti pasamak ken saan pay a nalawag ti kasaknap ti incursion.
Mainaig iti daytoy, guilty met ti nagbalin desision ti korte iti sangsangwen ti Russian-American ballerina a ni Ksenia Karelina a kaso mainaig ti treason kalpasan a naarestar gapu iti panagdonarna iti kuarta iti maysa a charity a mangsupsuporta iti Ukraine.
Naarestar isuna babaen dagiti autoridad idiay Yekaterinburg, agarup a 1,600km iti daya a paset ti Moscow. Idinto a ti sentensia na ket nairuar makalawas kalpasan nga inaramid ti Russia ken ti West country ti panagsisinnukat kadagiti balud sipud idi Cold War, no sadinno a 24 a tattao a naibalud iti pito a nagduduma a pagilian ti nagsisinnukat.
Kinuna pay ni Mikhail Mushailov nga ‘imposible’ a mairaman ni Karelina iti nabiit pay a naiwayat a panagsisinnukat kadagiti balud, gapu ta ti panagsisinnukat ket mabalin laeng a mapasamak apaman a maipakat ti sentensia ti korte.
