LAOAG CITY – Inpetteng ti Malacañang a saan a kasapulan ni Presidente Ferdinand Marcos Jr. a mangideklarar ti state of national emergency tapno palubosan ti gobierno a temporario nga imaton iti operasion ti industria ti langis iti baet ti ngumatngato a presio ti produkto a petrolyo.
Inpasigurado ni Palace Press Officer Claire Castro a nagtalinaed a kontrolado ti situasion ken agtultuloy daytoy nga imonmonitor ti gobierno.
Inbatadna a naiget ti pannakikoordinar ti Department of Energy (DOE) kadagiti oil company tapno bantayan ti suplay ken garaw ti presio iti merkado iti baet ti panagngato ti presio ti langis iti world market.
Nangiparuk-at ti rakurak ni Castro kalpasan a nagpanawagan ni Trade Union Congress of the Philippines (TUCP) Rep. ken House Deputy Speaker Raymond Democrito Mendoza a panunoten ti Presidente ti panangideklarar ti national emergency tapno palubosan ti temporario a panangimaton ti gobierno iti operasion dagiti kompania ti langis.
Dinakamat ni Mendoza ti Section 14(e) ti Republic Act No. 8479 a mangipapaay ti bileg iti Department of Energy a temporario a mangimaton iti operasion dagiti entidad iti industria ti langis iti panawen ti emerhensia.
Nupay kasta, kuna ni Castro a saan pay a dimmanon ti kastoy nga operasion ti agdama a kasasaad ken inallukoyna ti publiko nga agtalinaed a kalmado.
Innayonna nga ad-adalen ti administrasion dagiti addang tapno makissayan ti epekto ti panagngato ti presio ti langis pakairamanan ti posible a panangiyurnos ti buis kadagiti produkto a petrolyo a manarimaan a bukbuklen kas gakat para kadagiti agpanpanday linteg.
